Gal 3 | KhmKCB | STEP | ឱ ពួកអ្នកស្រុក កាឡាទី ដ៏ ល្ងង់ អើយ ! តើ អ្នកណា ដាក់អំពើ លើ អ្នករាល់គ្នា ឬ? នៅចំពោះ ភ្នែក អ្នករាល់គ្នា អ្នករាល់គ្នាបាន ទទួល ការពិពណ៌នា យ៉ាងច្បាស់ អំពីព្រះ យេស៊ូ គ្រិស្ដ ដែលត្រូវគេ ឆ្កាង នោះហើយ

Galatians 3

1 ឱពួកអ្នកស្រុកកាឡាទីដ៏ល្ងង់អើយ! តើអ្នកណាដាក់អំពើលើអ្នករាល់គ្នាឬ? នៅចំពោះភ្នែកអ្នករាល់គ្នាអ្នករាល់គ្នាបានទទួលការពិពណ៌នាយ៉ាងច្បាស់អំពីព្រះយេស៊ូគ្រិស្ដដែលត្រូវគេឆ្កាងនោះហើយ 2 ខ្ញុំគ្រាន់តែចង់ដឹងសេចក្ដីនេះពីអ្នករាល់គ្នាប៉ុណ្ណោះតើអ្នករាល់គ្នាទទួលព្រះវិញ្ញាណដោយសារការប្រព្រឹត្តតាមគម្ពីរវិន័យឬដោយសារការស្ដាប់ទាំងមានជំនឿ? 3 ម្ដេចអ្នករាល់គ្នាល្ងង់ម៉្លេះ? អ្នករាល់គ្នាបានចាប់ផ្ដើមដោយវិញ្ញាណតើឥឡូវនេះបញ្ចប់ដោយសាច់ឈាមឬ? 4 តើអ្នករាល់គ្នារងទុក្ខច្រើនដល់ម៉្លេះដោយឥតប្រយោជន៍ឬ? ប្រហែលជាឥតប្រយោជន៍មែនទេដឹង 5 ដូច្នេះដែលព្រះអង្គប្រទានព្រះវិញ្ញាណដល់អ្នករាល់គ្នាព្រមទាំងធ្វើកិច្ចការដ៏មានអំណាចនៅក្នុងចំណោមអ្នករាល់គ្នាតើដោយសារការប្រព្រឹត្តតាមគម្ពីរវិន័យឬដោយសារការស្ដាប់ទាំងមានជំនឿ? 6 ដូចដែលលោកអ័ប្រាហាំជឿព្រះជាម្ចាស់ហើយព្រះជាម្ចាស់ក៏រាប់គាត់ជាសុចរិតដោយសារជំនឿនោះ 7 ដូច្នេះចូរដឹងថាពួកអ្នកដែលមានជំនឿគឺជាកូនចៅរបស់លោកអ័ប្រាហាំហើយ 8 ហើយបទគម្ពីរបានដឹងជាមុនថាព្រះជាម្ចាស់នឹងរាប់ជនជាតិទាំងឡាយជាសុចរិតដោយសារជំនឿដូច្នេះហើយបានជាដំណឹងល្អត្រូវប្រកាសប្រាប់លោកអ័ប្រាហាំជាមុនថា៖«ជាតិសាសន៍ទាំងអស់នឹងទទួលពរតាមរយៈអ្នក»។ 9 ដូច្នេះពួកអ្នកដែលមានជំនឿក៏ទទួលព្រះពរជាមួយលោកអ័ប្រាហាំដែលជាអ្នកមានជំនឿដែរ។ 10 រីឯអស់អ្នកដែលពឹងផ្អែកលើការប្រព្រឺត្ដិតាមគម្ពីរវិន័យនោះត្រូវបណ្ដាសាហើយដ្បិតមានសេចក្ដីចែងទុកថា៖ «ត្រូវបណ្ដាសាហើយអស់អ្នកដែលមិនកាន់តាមសេចក្ដីទាំងអស់ដែលបានចែងទុកនៅក្នុងគម្ពីរវិន័យឲ្យប្រព្រឹត្តតាម» ។ 11 ដូច្នេះច្បាស់ជាគ្មានអ្នកណាម្នាក់ត្រូវបានរាប់ជាសុចរិតនៅចំពោះព្រះជាម្ចាស់ដោយសារគម្ពីរវិន័យឡើយព្រោះមនុស្សសុចរិតនឹងរស់ដោយសារជំនឿ 12 រីឯគម្ពីរវិន័យមិនពឹងផ្អែកលើជំនឿទេផ្ទុយទៅវិញអ្នកណាដែលប្រព្រឹត្តតាមសេចក្ដីទាំងនេះអ្នកនោះនឹងរស់ដោយសារសេចក្ដីទាំងនេះឯង។ 13 មានសេចក្ដីចែងទុកថា៖ «ត្រូវបណ្ដាសាហើយអ្នកណាដែលជាប់ព្យួរនៅលើឈើ» ដូច្នេះហើយបានជាព្រះគ្រិស្ដបានលោះយើងឲ្យរួចពីបណ្ដាសារបស់គម្ពីរវិន័យដោយព្រះអង្គត្រូវបណ្ដាសាជំនួសយើង 14 ដើម្បីឲ្យពររបស់លោកអ័ប្រាហាំបានមកដល់ពួកសាសន៍ដទៃដោយសារព្រះគ្រិស្ដយេស៊ូនិងដើម្បីឲ្យយើងបានទទួលព្រះវិញ្ញាណដែលជាសេចក្ដីសន្យាតាមរយៈជំនឿ។ 15 បងប្អូនអើយ! ខ្ញុំសូមនិយាយតាមបែបមនុស្សថាសូម្បីតែកិច្ចព្រមព្រៀងរបស់មនុស្សបើគេព្រមព្រៀងគ្នាហើយគ្មានអ្នកណាម្នាក់អាចលុបចោលឬបន្ថែមបានឡើយ។ 16 រីឯសេចក្ដីសន្យាទាំងឡាយនោះត្រូវបានសន្យាដល់លោកអ័ប្រាហាំនិងពូជពង្សរបស់គាត់ប៉ុណ្ណោះព្រះអង្គមិនបានមានបន្ទូលថា«ដល់ពូជពង្សទាំងឡាយ» ដែលសំដៅលើចំនួនច្រើននោះទេផ្ទុយទៅវិញបានមានបន្ទូលថា«ដល់ពូជពង្សរបស់អ្នក» ដែលសំដៅលើចំនួនតែមួយគឺជាព្រះគ្រិស្ដ 17 ខ្ញុំចង់និយាយដូច្នេះគម្ពីរវិន័យដែលមាននៅបួនរយសាមសិបឆ្នាំក្រោយមិនអាចលុបកិច្ចព្រមព្រៀងដែលព្រះជាម្ចាស់បានធ្វើកាលពីមុនបានឡើយហើយក៏មិនអាចធ្វើឲ្យសេចក្ដីសន្យាត្រលប់ជាឥតប្រយោជន៍បានដែរ 18 ព្រោះបើមរតកពឹងផ្អែកលើក្រឹត្យវិន័យនោះលែងពឹងផ្អែកលើសេចក្ដីសន្យាទៀតហើយប៉ុន្ដែព្រះជាម្ចាស់បានប្រទានដល់លោកអ័ប្រាហាំតាមរយៈសេចក្ដីសន្យា។ 19 ដូច្នេះហេតុអ្វីបានជាមានគម្ពីរវិន័យ? គម្ពីរវិន័យត្រូវបានបន្ថែមមកដោយព្រោះការល្មើសរហូតទាស់តែពូជពង្យដែលបានសន្យានោះមកដល់ហើយគម្ពីរវិន័យត្រូវបានបង្គាប់មកតាមរយៈពួកទេវតាដោយដៃរបស់អ្នកសម្រុះសម្រួលម្នាក់។ 20 អ្នកសម្រុះសម្រួលមិនមែនសម្រាប់ភាគីតែម្ខាងឡើយប៉ុន្តែព្រះជាម្ចាស់គឺមួយអង្គប៉ុណ្ណោះ។ 21 ដូច្នេះតើគម្ពីរវិន័យទាស់នឹងសេចក្ដីសន្យារបស់ព្រះជាម្ចាស់ឬ? ទេមិនមែនទេ! ដ្បិតបើក្រឹត្យវិន័យដែលបានប្រទានមកអាចផ្ដល់ជីវិតបាននោះសេចក្ដីសុចរិតនឹងមកតាមរយៈក្រឹត្យវិន័យយ៉ាងពិតប្រាកដ 22 តែបទគម្ពីរបានបង្ខាំងអ្វីៗទាំងអស់ឲ្យនៅក្រោមបាបដើម្បីឲ្យសេចក្ដីសន្យាតាមរយៈជំនឿលើព្រះយេស៊ូគ្រិស្ដបានប្រទានមកដល់ពួកអ្នកដែលជឿ 23 ប៉ុន្ដែមុនពេលជំនឿមកដល់យើងត្រូវបានឃុំទុកនៅក្រោមក្រឹត្យវិន័យគឺត្រូវបានបង្ខាំងរហូតដល់ជំនឿដែលនឹងមកលេចចេញមក។ 24 ដូច្នេះគម្ពីរវិន័យជាអ្នកមើលថែយើងដែលនាំយើងទៅឯព្រះគ្រិស្ដដើម្បីឲ្យយើងត្រូវបានរាប់ជាសុចរិតដោយសារជំនឿ 25 ប៉ុន្តែពេលជំនឿមកដល់ហើយនោះយើងមិនស្ថិតនៅក្រោមអ្នកមើលថែទៀតឡើយ 26 ព្រោះអ្នកទាំងអស់គ្នាជាកូនរបស់ព្រះជាម្ចាស់ដោយសារជំនឿលើព្រះគ្រិស្ដយេស៊ូ 27 ដ្បិតអស់អ្នកដែលទទួលពិធីជ្រមុជទឹកនៅក្នុងព្រះគ្រិស្ដនោះបានប្រដាប់ខ្លួនដោយព្រះគ្រិស្ដហើយ។ 28 ដូច្នេះដោយព្រោះអ្នកទាំងអស់គ្នាបានត្រលប់ជាតែមួយនៅក្នុងព្រះគ្រិស្ដយេស៊ូនោះគ្មានជនជាតិយូដាគ្មានជនជាតិក្រេកគ្មានបាវបម្រើគ្មានអ្នកមានសេរីភាពហើយក៏គ្មានប្រុសគ្មានស្រីទៀតដែរ 29 បើអ្នករាល់គ្នាជារបស់ព្រះគ្រិស្ដនោះអ្នករាល់គ្នាជាពូជពង្សរបស់លោកអ័ប្រាហាំដែរហើយជាអ្នកស្នងមរតកតាមសេចក្ដីសន្យាទៀតផង។